أحمد العوضي: لما بغير على ياسمين عبد العزيز بتخانق وعقلي بيعطل

حلّ الفنان أحمد العوضي، ضيفًا في برنامج صاحبة السعادة والذي تقدمه الإعلامية إسعاد يونس، والمذاع عبر شاشة قناة DMC، وتحدث العوضي عن غيرته على زوجته النجمة ياسمين عبدالعزيز.

غيرة أحمد العوضي على ياسمين عبد العزيز

وقال العوضي: "كنت بتخانق وأنا صغير في المدرسة بس اتعلمت حاجة إن أي اتنين بيضربوا بعض بيتهانوا وعلشان كدا كنت بحوش بس في الخناقات، بس أنا لو أنا غِرت على ياسمين عبد العزيز لو حد غتت هتخانق وهنا العقل بيعطل والحمية هي اللي بتسحبني، بس عمري ما أتخانق مع أخويا أصل احنا اتنين واتخانقت لأخويا واحنا صغيرين".

وفاة والدة أحمد العوضي

واستطرد حديثه متذكراً وفاة والدته: "أمي ماتت وأنا صغير كان عندي 9 سنين فأبويا هو اللي رباني أنا وأخويا وعلشان كدا ممكن تكون شخصيتي ناشفة شوية لإني تربية راجل وما كانش فيه أم، اتربينا في بيت بسيط مساحته 60 متر، ولما جيت اخترت أبقى ممثل أعطاني والدي الحرية أبقى أختار زي ما أنا عايز بس محمل بالتجارب في عين شمس ولغة الشارع وأي حاجة بنجح فيها بنزل آخد صداها من منطقتي وكل أسبوع بروح هناك بس بالليل متأخر شوية، وأنا منتمي لعين شمس علشان الناس اللي هناك، وأنا على الفيس بوك بقول الجمهور دول إخواتي".

نور الشريف وأحمد العوضي

وأردف: "الفنان الراحل نور الشريف أول واحد اكتشفني وكان لما بيقعد وكان دايما طول الوقت يقول لي لازم توسع مداركك وتقرأ كل حاجة ولو ورقة جرنال لأنك وارد تتسأل في أي حاجة".

واختتم: "مرة قلت للفنان نور الشريف أنت قلت لي هتبقى نجم وأنا ما بقتش نجم  وما حدش بيكلمني قال لي يبقى فيه حاجة ناقصة وكل بني آدم وله وقته وهل لما الوقت يجي لك هتبقى جاهز؟ اشتغل عشان تبقى جاهز من كل حاجة ثقافة ورياضة وتنمي مهاراتك التمثيلية لأن الفرص ما بتجيش إلا مرة واحدة وهنا ابتدا الكلام يعلم جوا دماغي واخدت النصيحة وعملت بيها".