بنتنا وحبيبتنا.. أشرف زكي يكشف حقيقة عودة حلا شيحة للتمثيل
أعرب الدكتور أشرف زكي نقيب المهن التمثيلية، عن سعادته بحصوله على جائزة الدولة التقديرية، أثناء حلوله ضيفًا على برنامج معكم منى الشاذلي.
جائزة الدولة التقديرية
قال أشرف زكي:" لازم يجي الترشيح من مؤسسات ينفع ترشحني، جامعة القاهرة رشحتني للحصول على جائزة الدولة التقديرية، ولما أسماء المرشحين جتلنا كنت بخرج بره وامتنعت عن التصويت ومصوتش لنفسي، وأثناء الاختيار أنا مكلمتش حد، وبعد ما خلصوا تصويت بعتولنا، وأول ما دخلت سقفولي على إني خدت الجائزة، وزمايلي كلهم كانوا بيدعموني وبيقولولي بالتوفيق وكانت البشاير مبشرة".
وأضاف أشرف زكي: "روجينا كانت عارفة إني مرشح لجائزة بس مش فاهمة، ولما خدت الجائزة أنا معرفتهاش ونسيت أقولها، أنا باخذ جائزتي على رحلتي الطويلة من العطاء، لترد عليه منى الشاذلي قائلة: هتجيب لروجينا إيه، ليرد النقيب ممازحًا: هجبلها كتاب".
وتابع:" الحمد لله قدرنا نوثق شهادة المعهد العالي للفنون المسرحية في المجلس الأعلى للجامعات بفضل الله، ودي كانت من أصعب المهمات اللي عملتها، وكمان عملت جدار أكاديمية الفنون لإننا كنا في مكان صعب جدا، ودلوقتي المنطقة بقت منارة بس السور حولناه مكتبات ومنافذ لبيع الأدوات اللي يستخدمها الطلاب".
حقيقة عودة حلا شيحة للتمثيل
وكشف الفنان أشرف زكي نقيب المهن التمثيلية، حقيقة عودة الفنانة حلا شيحة للتمثيل من جديد، وقال: "إجاباتي منطقية، مبديش إجابات رومانسية، أنا قولت لو هي قررت ترجع أنا مش صاحب القرار، أنا هاخد رأي الأسرة الفنية كلها قبل مجلس الإدارة".
وتابع أشرف زكي: "هقولهم أنتم كفنانين رأيكم أيه؟ وهما كلهم متسامحين وهي بنتنا وحبيبتنا، وكلمتني وقالتلي راجعه قريب وعايزة أقعد معاك".
