لا صغير ولا حليوة.. ميمي جمال: ماما كانت رافضة جوازي من حسن مصطفى

حلت الفنانة ميمي جمال، ضيفة على برنامج واحد من الناس، الذي يقدمه الإعلامي الدكتور عمرو الليثي، وخلال لقائها تحدثت عن العديد من الأسرار حول مشوارها الفني.

ميمي جمال تتذكر زوجها الراحل

وقالت خلال لقائها: “زوجي الفنان الراحل حسن مصطفى كان زميلي في فرق التليفزيون اللي عملها سيد بدير واحنا كنا في المسرح الكوميدي، وأنا كنت في الفترة دي مخطوبة لظابط وعندي 17 سنة، وكان شاب قمر وعرفنا بعض سنة ونصف وبعد كده قلت له يلا بقى عايزين نتجوز”.

وأضافت: "فقال لي أنا مستنيكي تبطلي تمثلي علشان اتجوزك فقلت له أبطل تمثيل ليه ما انت بتاخدني توصلني لما بروح المسرح فرفض، وقال لي مينفعش أبقى ظابط ويتقال لي أنا شوفت المدام في الفيلم امبارح".

وتابعت خلال لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": "حصلت ما بيني وبين خطيبي الظابط مشاكل وحصلت جوايا كسرة جامدة وقلت له كنت عرفتني من زمان مش تسيبني الفترة دي كلها وبعدين جاي تقولي مش هاتجوزك الا لما تبطلي تمثيل، وكنت وقتها بدأت اشتغل مسرحية مطرب العواطف وكان حسن مصطفى من النوع اللى يحسس انه أبوك وأخوك وعمك وخالك ودنه بتسمع فابتدي يتكلم معايا واخدنا على بعض وارتبطنا ببعض وقلت ابويا توفى وانا محتاجة لحد واخلف".

ميمي جمال تبكي بسبب ذكرياتها مع حسن مصطفى

وأكملت باكية: “حكيت لـ حسن مصطفى حكايتي وابتدينا ناخد علي بعض واتعودنا علي بعض وهو يحكيلي وانا احكيله، هو كان متجوز قبلي وكان عنده بنت سمية حبيبتي، فحصل حاجة بينه وبين مراته، وجاء سيد بدير وقال والله لو بتحبوا بعض ليه ماتتجوزوش فقلت له هو متجوز لما أموره تستقر ويشوف هو عايز ايه نبقى نتكلم لكن أنا دلوقتي مقدرش اتجوز انسان معرفش ظروفه ايه وظروف مراته ايه لإني مسمعتهاش”.

واختتمت:  سيد بدير قال له ادي لنفسك فرصة وشوف انت عايز ايه يا حسن واذا كنت مستقر في بيتك واذا مش ممكن يبقى تشوف هتعمل ايه مع بنتك، وقتها طلق مراته لإنه كان نفسيته تعبانة جدا معاها وبعديين اتجوزنا بقى وعشنا مع بعض 45 سنة وهي الجوازة الوحيدة اللى في حياتي".

سر رفض والدة ميمي جمال لحسن مصطفى

ميمي كشفت سر رفض والدتها لزواجها منه وقالت: "ماما مكنتش موافقة اني اتجوز حسن مصطفى، وقالت لي لا هو صغير ولا حليوة ولا انتي اول بخته واكبر منك بـ14 سنة وموظف معاكي في نفس المكان وبياخد نفس مرتبك وهو اصلا كان بيشتغل في التربية والتعليم كان وكيل وزارة".