"توارد أفكار".. هيثم نبيل رداً اتهام عمرو مصطفى لزملائه بسرقة ألحانه

خرج الفنان هيثم نبيل عن صمته، ورد على تصريحات عمرو مصطفى التي هاجم فيها بعض زملائه بسرقة ألحانه، معرباً عن غضبه من تلك التصريحات.

تصريحات هيثم نبيل 

ونشر هيثم نبيل فيديو عبر حسابه الرسمي بموقع التواصل الاجتماعي “فيسبوك”، قال فيه: "أنا عامل الفيديو ردا على صديقي الفنان اللي بحبه عمرو مصطفى عندي تحفظ على تصريحاته الفترة الأخيرة على الزملاء وعلى شكل الفن، أنا تحليلي للموضوع أن عمرو مصطفى عز فترة نجاحاته كانت كل الناس بتشوف إيه اللي ينجح وتجري وراه، الأغنية اللي تنجح كل المطربين يقفوا في طابور واحد وعاوزين نفس النجاح، مش عايزين يعملوا نجاح مختلف، لكن في آخر 10 سنين حصل تغيير في الأجيال وبقى في تنوع في الأذواق ودي حاجة صحية مش مضرة".

وتابع : "طول عمرنا بنشوف برا عندهم تنوع كبير وكل نوع من الأنواع ليه جمهوره، أنا كنت بغير جدا أن برا في التنوع دا، ودلوقتي بقى عندنا في مصر أنواع كتيرة من الموسيقى مختلفة وفي الآخر بيحصل تنقية كل حاجة جديدة الناس بتسمعها فترة وبعدها بتنقي، كون أن أحنا نتخض من اللي حصل ميقولش أن الصناعة بتنهار دي حاجة صحية، وبالعكس دي أكتر فترة نجاحات لمطربين كتير في مصر وبرا مصر، إزاي الصناعة منهارة وأحنا شايفين أن مثلا أحمد سعد بيغني من فترة كبيرة ودلوقتي في عز نجاحاته، والهضبة ومحمد منير وتامر عاشور ورامي صبري وتامر حسني كلهم ناجحين وبيتم استقبالهم في الخارج بشكل كبير، كون أن أنا في الفترة الأخيرة مش مشارك في النجاحات دي مش معناها أن الصناعة وقعت".

وأضاف: "تاني حاجة تصريحات الاتهامات وأن عمرو مصطفى قال إن رامي صبري سرق منه أغنية "يمكن خير" في حاجة أسمها سرقة وفيه توارد أفكار، رامي فنان تقيل وعنده أغاني كتير ناجحة ومش الأغنية دي اللي هتصنع وتفرق في مشواره، ورامي مش فنان قليل عشان يسرق عمرو مصطفى، دي حاجات بتحصل".