الصلح خير.. انتهاء أزمة عمرو مصطفى ورامي صبري على الهواء

أعلن الفنان عمرو مصطفى عن صلحه مع الفنان رامي صبري، بعدما حجب أغنية يمكن خير لـ رامي أمس من على موقع الفيديوهات يوتيوب.

صلح عمرو مصطفى ورامي صبري

وقال عمرو مصطفى خلال استضافته في برنامج أجمد 7 الساعة 7 على إذاعة نجوم إف إم: "آخر الموضوع ده، أنا عايز بس أقول لرامي حاجة؛ لأنه صديق ليا لو غلط فيك هعتذر ومش هيبقى عندي ايجو، وهبقى فخور بيا، مش هنام بليل وأنا مضايق حد؛ لأن موضوع مغرور ده سببلي مشاكل كتير مع الجمهور، لغاية ما تطاولوا عليا ومكنش ينفع يحصل معايا، نجاح 5 شهور من حياتي المهنية في بداياتي هي بالتاريخ بتاعكو كلكو، هل ده غرور؟ لا حقيقة وبالأرقام".

تصريحات عمرو مصطفى 

وأضاف عمرو مصطفى: "لو حد يجي يقولي مينفعش تقول كده؟ طب ما انتو استباحتوا ألحاني، كان ممكن يقولي يا عمرو مخدتش بالي وهعديها، بعلم الأجيال الجاية مينفعش حد ياخد مني ألحان بالشكل ده، هو الموضوع تصاعد لما جيه وقال أنا وأنا، وأقعده في البيت، مين اللي يقعد مين في البيت؟ إزاي جات في خياله، جات إزاي؟ بليغ حمدي خريج إيه؟ مهو خريج حقوق".

وتابع عمرو مصطفى، قائلًا: "إمبارح بالليل قسمًا بالله وأنا بعمل الفيديو ده كنت متضايق ولحد دلوقتي متضايق، عايز أقوله أهدى القصة مش أنت، هما بيشغلوني بيك، هما 3 معروفين في الوسط الموسيقي منهم 2 مش موجودين وواحد بيسخنهم ويبسك عليه، وأنا معنديش مشكلة في صفحة جديدة، أقسم بالله يا رامي نجاحك من نجاحي، مش هروح أرفع قضية، أنا بحب البني آدم ده، ومينفعش حد يبوظ هيبتي، عيب، بعترف إنك اكتر واحد بتدافع عني، حصل خير يا رامي، متفرحش الناس فينا واقفل الموضوع، ولو كان خاني التعبير عشان ولادك وولادي متزعلش بس الكلام اللي قولته كان صعب، أنت بردو بتتحارب وعارف ده كده".

تصريحات رامي صبري 

ورد عليه رامي صبري قائلًا في مداخلة هاتفية بنفس البرنامج: "أنت عارفني من زمان جدًا مش بتاع مشاكل متخليهمش يسحبونا لمشاكل، أنت راجل ملحن وعظيم ومن قبل ما اشتغل في الشغلانة وأنت نجم في المزيكا وبنفتخر أن فيه فنان زيك في مصر.. بس الاختلاف في الطريقة بتاعت الاختلاف، ودخلت بيتك وعيشنا واشتغلنا،  فيه حتة إن لو رامي أخد مني حاجة او فيه شبه.. احنا بنتكلم على الواتس اب او الفون، أنا عمري ما هطلع اغلط فيك أو متضايقتش منك، اتضايق من الاسلوب في الكلام عليا.. عشان اكيد ليا مكانتي وليا جماهير في الوطن العربي، ولما حد زميل يقلل مني".

وأكمل رامي صبري:" أنا كمان مش هحب اطلع اتكلم على حد مهم زيك كده، أنا متبسطش؛ لأني أحب اظهر وسط الناس بالاحترام، إنما احنا لازم نبقى قدام الناس احنا المعلمين للجيل الجديد حتى لو بينا خلاف".

وواصل رامي صبري: "اختلفت مع محمد رحيم كان في 2013 عشانك وبدافع عنك في الوسط الفني وقدام الناس كلها وبقول ده احسن واحد في العالم وده لحد امبارح، ولحد امبارح لما اتعلقت الأغنية بقول أكيد مش عمرو".