فريدة سيف النصر: بخاف من الموت.. وصاحبتي خطفت جوزي وقالي جزمتها برقبتك

تحدثت الفنانة فريدة سيف النصر، عن تفاصيل مؤلمة في حياتها الشخصية، أبرزها قصة تعرضها للخيانة على يد أقرب صديقاتها، مشيرة أنها تزوجت في عمر الـ20 عاما بسبب خوف والدها عليها من الفضائح والشائعات بعدما أدت دور الإغراء في فيلم 4-2-4. 

تصريحات فريدة سيف النصر 

وقالت فريدة سيف النصر خلال لقائها ببرنامج “كلمة أخيرة” الذي تقدمه الإعلامية لميس الحديدي: "بدلة الرقص اللي رقصت بيها في فيلم 4-2-4 كانت مكشوفة والدنيا اتقلبت عليَّ بعدها، بابا وقتها قال لي انتي هتفضحينا؟! وبسبب كده خلاني أتجوز وأنا عندي 20 سنة، وخلفت محمد ابني، وفترة الجواز امتدت 8 سنين، ودي الجوازة الوحيدة اللي اتجوزتها، وكنا ننفصل ونرجع تاني".

تعرض فريدة سيف النصر للخيانة

وأضافت: "تعرضت للخيانة وصديقتي المقربة خطفت جوزي وهي كانت من خارج الوسط، اكتشفت الخيانة، وهو بيكلمها في التليفون، وسمعت وقتها أحلى كلام، واللى سمعته لا يمكن تحمله رُحت مبهدلاهم الاتنين، فطلع لي برة وقال لي إزاي تكلميها كدة؟! دي جزمتها برقبتك وضربني، وقتها أصريت على الطلاق وبعد ما انفصل عني اتجوزها".

سر عدم زواج فريدة سيف النصر مجددا

قالت فريدة سيف النصر: "متجوزتش بعده لإني مبحبش التغيير، واتخطبت بعد الانفصال من رجل أعمال كبير بس مقدرتش أتجوز، وبيت ابني لوحدي واتربى مع إخواته من والده".
 

وتابعت سيف النصر:"وأنا ببص على شريط العمر بقول الحمد لله كان طريق مش سهل وكله مطبات واتشال من أدوار وحاجات، إن الله مع المنكسرين جابر".

وتابعت خلال لقائها ببرنامج “كلمة أخيرة” الذي تقدمه الإعلامية لميس الحديدي بقناة “أون”:"مشواري وقعت وقمت فيه، اتظلمت كتير وربنا نصرني، إني كنت حلوة أوي في فترة الثمانينات مش مشكلتي دي بتاعت ربنا".

وأضافت:"أنا معملتش أفلام مقاولات ودي كانت محاولة علشان يهدوا اللي أنا عملاه ويقللوا المرحلة الناجحة بتاعتي، ولكن ده تاريخ مصر السينمائي".

وتابعت فريدة سيف النصر:"أحلى دور جوا قلبي عامل علامة كان فيلم بدون ذكر أسماء،  الأستاذ وحيد حامد كان بيتحارب علشان معملش الشغل ده وجاء تامر محسن أصر على".

وأشارت:"اتشلت من أفلام وأدوار مهمة بسبب نجمات كبار بحجة إني جميلة وهغطي عليهم..اتحجبت وابتعدت عن التمثيل حوالي 9 أشهر، وقتها اتمارس على ضغوط كبيرة من بعض النجمات، علشان كنت حلوة وعندي قبول".

ولفتت:"أنا كنت بحب الرقص جدا ودايما يجيبوني من مسرح المدرسة وأنا برقص وبغني وأمثل، ناظرة المدرسة قالت لأمي وقتها لمي بنتك بدل ما تلاقيها رقاصة، ومن هنا بدأت أمثل وفريد شوقي ونور الشريف بصوا لي وقالوا لي عنيكي دي بتقول إنك هتبقي ممثلة جامدة، ولما عملت فيلم الضحايا أول عمل ليا، أخدت كمية أفلام كبيرة وطلعت مع سمير غانم وجورج سيدهم في عروضهم المسرحية".

وأشارت:"أنا اللي حطيت نفسي في حتة البنت اللعوب في الأفلام واغرتني هند رستم لما قالت أنا بشوف إن فريدة سيف النصر ممثلة إغراء، علشان دخلت في المنطقة دي".

وتابعت:"أنا بخاف من الموت جدا وجبانة، وفاة أخويا الصغير اللى كان شاب طول وقمر وكان أصغر واحد فينا هزني جامد لإنه كان عمره 21 سنة واتخطف بدري ومقدرتش أشوفه وهو بيتدفن في قبره، بعدها اتحجبت، كنت بقعد أنا والفنانة نورة نقعد نقرأ قرآن، ومشيت في طريق الحجاب لمدة 9 شهور، وقررت خلع الحجاب لما دخلت مع محجبات لما حسيت إني لازم أنزل أشتغل وكنت وقتها اتطلقت ومعنديش حد يصرف عليا ومكنش ينفع انزل اشتغل بالحجاب ولا بالباروكة علشان الناس شايفني بشكل معين".

وقالت فريدة سيف النصر:"الشباب لسه فاكريني بمشهد الفراخ مع عادل إمام، وانا بقولهم يا شباب أنا عديت الستين خلاص هو أنا هتحنط وأفضل زي ما أنا".

وأكدت:"أنا ضد عمليات التجميل وعمري ما عملتها ولا هعملها، هاتولي حد عمل عمليات تجميل وبقى حلو.. والبوتكس نوع من سم التعابين".

وبكت فريدة سيف النصر علي الهواء، بعد رؤيتها لمشهد من دروها في مسلسل"عملة نادرة"، قائلا:"حسيت إن الشخصية أمي مرت بيه وناس كتير بحبهم، فكنت مشحونة".