تامر أمين لـ رضا البحراوي: 9 ولاد كتير علينا براحه على مصر انت لسه شاب كان كفاية اتنين
حرص الإعلامي تامر أمين، على التعليق بعد أنباء قدوم مولود المطرب الشعبي رضا البحراوي التاسع، مشيرًا إلى أن الأسر لا بد أن تكتفي باثنين أو تلاتة فقط.
تصريحات تامر أمين
وقال تامر أمين، خلال برنامجه “آخر النهار”: "أولًا ألف مبروك يا رضا ويارب تفرح بذريتك، وقبل ما تكلم ربنا يزيد ويبارك وربنا يديك الصحة، بسم الله ما شاء الله، بس كلامي لرضا وكل رضا أنا بسأل سؤال مش كتير علينا إحنا".
وأضاف: "هتقولي وإنت مالك، هو إنت اللي هتصرف عليه وهتربيه، هقولك ربنا يقدرك وتطلعه أحسن الناس، بس هو كتير علينا وعلى مصر، وكلامي مش بس لرضا، كلامي لكل الناس التانية اللي فاتحة باب الخلفة على البحري، كتير علينا".
مولود رضا البحراوي التاسع
وواصل:" 4 مواليد كل دقيقة عايزين 4 أماكن في المدارس، و4 أماكن لا قدر الله لو مرضوا في المستشفيات، وعايزين 4 أماكن في المواصلات، ودعم وبطاقات التموين وشقق وفرص عمل".
وأختتم تامر أمين قائلًا: "خد عزوتك من أصحابك وأهلك وأولادك، لكن كفاية اثنين أو ثلاثة أو أربعة، لكن تسعة، ورضا لسه شباب، يعني لو كمل على المسيرة دي مش هنلاحق عليه، بسم الله ما شاء الله، ربنا يديك الصحة، القصة هنا مش رضا، أنا بقول لكل الناس في مصر براحة على مصر، إنتوا شايفين الأوضاع والأزمات والأسعار والموارد، واحدة واحدة".
