بهاء الدين محمد يتراجع عن الاعتزال: كانت لحظة سخيفة
أعلن الشاعر الغنائي بهاء الدين محمد تراجعه عن قرار الاعتزال الذي كان قد كشفه خلال الأيام الماضية، حيث لم يعلن وقتها عن أسباب القرار المفاجئ.
اعتزال بهاء الدين محمد
وكتب بهاء الدين محمد عبر حسابه الشخصي على موقع التواصل الاجتماعي "فيس بوك": "مهما توقعت أو حسيت أو تخيلت مش حعرف أوصف إحساسي بكلام يرد بكل احترام على رد فعلكم وفعل زمايلي الفنانين اللي رافضين قرار اعتزالي والتركيز فقط على تأملات في نِعم الله".
وأضاف: "رد الفعل اللي رافض القرار خلاني أسكت وأفهم وأعرف وأشوف بصورة واضحة مدى الحب والتقدير اللي وصلني من كل مكان وعرفت من خلاله إن ليَّ مكان في قلوب من حقهم الرفض، ورد الفعل اللي رافض الاعتزال خلاني أتجاوز اللحظة اللي خليتني أفكر فى القرار".
وتابع: "كانت لحظة سخيفة اتجمعت فيها أحداث كتيرة مش حلوة ونفوس وقلوب كلها حقد وسواد وغباء في الحياة الفنية والشخصية، وكم كبير من ضعف وطمع ناس مش ناس".
واستكمل: "وأنا مهما قابلت أي هجوم قذر بس حست إني محتاج هدوء، وحسيت في لحظة إني محتاج أعيش لنفسي ومع نفسي بعيد عن أي ظروف تجبرني على الاحتكاك أو معاملة المرفوضة دين وحياة وأخلاق.. وأنا مش سهل أوصف ناس بالشكل ده".
في السياق ذاته، أوضح بهاء الدين محمد قائلًا: "قررت شطب واستئصال كل حد لا يليق ومرفوض، واحتفظت فقط بالناس اللى قلوبهم ونيتهم سليمة فى الفن والحياة، وشكرًا على هذا الحب والاحترام اللي حفضل قده وأرد عليه بكل فن، وبشكر كل قلب كتب لي أو بعت لي أو كلمني يطمن عليَّ واعتبرته شاركني ووقف معايا بكل حب في التجربة دي".
واختتم: "ومهم جدًّا أقول أنا مش بتاع ترندات ولا ظهور إعلامي بالعكس من سنين واخد قرار أعيش في حالي بعيدًا عن الأضواء وأسيب أعمالي فقط في دايرة الضوء ويكفيني إن كلماتي تعيش وتفضل ناجحة وفي قلوبكم، شكرًا من قلبي يا أغلى الناس".
