إبراهيم عمران: هند رستم مارلين مونرو مصر وشيرين عبد الوهاب مش بتعرف تمثل
كشف الريجسير إبراهيم عمران، رئيس جمعية الكومبارسات، عن العديد من الأسرار التي جمعته الفنانين الراحلين مثل هند رستم وعمر الشريف، وكذلك الحاضرين مثل شيرين عبدالوهاب وعلا غانم، وذلك خلال حواره مع الإعلامية إنجي هشام في برنامج المنسي عبر قناة هي.
تصريحات إبراهيم عمران
وقال إبراهيم عمران:" الجيل اللي ميعرفش هند رستم بقولهم دي مارلين مونرو مصر، مرة بعتني ليها الأستاذ يوسف شاهين أبعتلها دعوة ودخلت بقولها دي دعوة من أستاذ يوسف قالتلي أهلا باللي من ريحة الغالين ودخلت بيتها واتكلمت معاها".
وأضاف: "سألتني أول حاجه و قالتلي الناس اللي ورا الكاميرا أخبارهم إيه، قالتلي لولا الناس دي مكنتش هكون موجودة، إيه الجمال ده؟".
وتابع إبراهيم عمران عن فيلم حسن ومرقص:" كنت مرة بعمل فيلم حسن ومرقص مع الاستاذ عادل والأستاذ عمر الشريف، وأستاذ رامي إمام عمل بريك في مشهد كبير كان فيه مجهود وأنا كنت واقف بسيطر على المجاميع، وطلبت كرسي للاستاذ عمر الشريف قالي لا يا عم إبراهيم لما الناس كلها تقعد أنا هبقى أقعد".
علاقة إبراهيم عمران ويوسف شاهين
وتحدث عن حياته مع المخرج يوسف شاهين قائلا : "يوسف شاهين كان عنده النجم زي الكومبارس زي المجاميع كلنا عيلة واحدة وبناكل في طبق واحد".
وقال إبراهيم عمران: "علا غانم كانت من ضمن المجاميع كمان حنان شوقي كانت من المجاميع وكانت بتجتهد لحد ما بقت نجمة".
وأوضح أن محمد هنيدي كان بيطلع في أدوار صامتة وكنت بكلمه على تليفون الجيران، وشيرين عبدالوهاب في أول ظهور ليها في فيلم ميدو مشاكل مكنتش بتعرف تمثل".
وعن الفنانة جيهان نصر، قال في تصريحات تليفزيونية: "كنت بعمل فيلم اسمه زيارة السيد الرئيس مع الفنان محمود عبد العزيز وهياتم وحسن الاسمر، وجالي استاذ محمد راضي قالي عايز بنت شكلها جميل وفلاحة وتطلع مرات حسن الاسمر ووشها مصري".
تابع:" احنا زمان كنا بنمشي بشنطة فيها أجندة العناوين والصور وبكون عارف خط سير الممثل وأعرف اجيبه من تحت الأرض، فطلعت الشنطة وقلتله اختار الصور وعينه وقعت على جيهان نصر ، فقولتله برافو عليك البنت دي جميلة جدا قالي عايز أشوفها، قومت روحت لأبوها البيت، وكانت بتعمل اعلانات ومرضيش في البداية قولتله دي فرصة ومش هتتعوض وأقنعته".
وأضاف: "جت جيهان وعملها كاستينج واقتنع بيها وعملت البطولة بـ ٣٠٠٠ جنية، وكمان في فيلم «البطل» كنت بعمل الفيلم ده".
